Mubalik sa pagka-bad-boy si Senador Robin Padilla human napagawas ang advance screening sa pelikulang “Bad Boy 3” sa usa ka mall sa Cubao, Quezon City.
Gihimo ni Padilla ang anunsyo, pipila ka oras, human siya mitampo sa kontrobersyal nga pagdungog sa Senate Blue Ribbon Committee nga gipangulohan sa kampo ni Senate President Alan Peter Cayetano.
Kauban ni Padilla sa maong pagdungog sila Senadora Pia Cayetano, Senador Rodante Marcoleta, ug Senadora Imee Marcos, diin gihisgutan ang mga alegasyon bahin sa giingong mga anomalya sa flood control projects.
Pagkahuman sa mga panghitabo sa Senado, midiretso si Padilla sa screening sa Bad Boy 3, ang pinakabag-ong installment sa pelikula nga naghatag kaniya sa bansag nga “Bad Boy of Philippine Movies” sa dekada ’90. Pag-abot sa venue, dali nga gipangita ug gihagkan ni Padilla ang iyang asawa nga si Mariel Rodriguez.
Sa pakighinabi sa media, iyang giangkon nga mas malipay siya sa kalibutan sa showbiz inay politika tungod kay lahi ang kalipay nga madala sa shooting itandi sa bug-at nga responsibilidad sa politika.
Iyang gipadayag nga posible niyang ipamana sa iyang pag-umangkon nga si Daniel Padilla ang titulo nga “Bad Boy” ug mahimong maka-loveteam ni Kaila Estrada sa umaabot nga mga proyekto.
