Gipadayag ni Hamilcar Chanjueco Jr., founder sa Mindanao Pride, nga adunay pag-uswag ang kahimtang sa mga katungod sa LGBTQIA+ community sa nasud karong panahona.
Bisan pa man sa maong kalamboan, giangkon niya nga duna pa gihapoy mga babag nga angay pang lutsan sa maong sektor aron hingpit nga makab-ot ang ilang tinguha.
Gipasabot ni Chanjueco nga samtang makita na ang mga miyembro sa LGBTQIA+ sa media, academe, negosyo, ug gobyerno, padayon gihapon ang pag-atubang nila sa diskriminasyon, ilabi na sa mga transgender.
Hinuon, nagkulang pa ang proteksyon sa mga lokal nga ordinansa tungod kay gibanabana nga wala pay usa porsyento sa 250 ka mga lungsod, siyudad, ug probinsya sa Mindanao ang nagpatuman niini.
Tungod niini, nanawagan ang Mindanao Pride og mga polisiya nga makahatag og tinuoray nga panalipod batok sa diskriminasyon base sa gender identity ug sexual orientation.
