Gikondenar ni Bro. Wilson Amad, usa ka moralista, ang mga gihimong pamahayag ni Bise Presidente Sara Duterte ug iyang gihulagway ang pagpanhulga isip usa ka imoral nga binuhatan.
Matod pa sa moral advocate, ang hulga sa kinabuhi dako kaayong supak sa balaod sa Diyos ug sa “Ten Commandments” nga nagdili sa bisan unsang matang sa kapintasan batok sa isigkatawo.
Iyang gipamugos nga isip usa ka opisyal sa kagamhanan, ang bise presidente angay untang magsilbing sumbanan ug ehemplo sa maayong pamatasan sa katilingban.
Gidugang pa ni Amad nga ang maong makatandog nga mga pulong naghatag sa grabeng kabalaka dili lamang ngadto sa presidente ug sa pamilya niini kon dili lakip na sa tibuok katawhan.
