Gipamugos ni Ben Ranque, ang Founding Convenor sa Masa Sara Duterte Alliance kon MASADA, nga dili angay nga palabyon lang sa administrasyon ang mga isyu kalabot sa anomaliya sa flood control projects sa nasud.
Sumala pa kaniya, kritikal kining hisgutan tungod kay nag-atubang na usab ang Pilipinas sa mga natural nga kalamidad ug mga bagyo nga nagdala og hulga sa kinabuhi ug kabtangan sa katawhan.
Dugang pa niya, dili usab mabasol ang katawhan kon sila makaduda sa performance sa kasamtangang liderato, ilabi na nga adunay 6.7 trilyon ka pesos nga badyet ang ginalokar apan nagpabilin ang mga pangutana kon asa paingon ang pondo ug nganong padayon gihapon ang pagpakpak sa mga proyekto nga wala naimplementar og sakto.
Busa, gipahimangnoan ni Ranque ang katawhan nga dili usa mupakpak sa mga achievement sa gobyerno kay daghan pa ang mga proyekto nga gihulagway niya nga ghost projects nga wala gayud mapahimusli sa publiko.
