Gikondenar ni U.S. Secretary of State Marco Rubio ang International Criminal Court o ICC ug gitawag kini nga “stupid organization” samtang iyang gipalig-on ang baruganan sa Estados Unidos atol sa ASEAN Foreign Ministers’ Meeting sa Manila.
Matod ni Rubio nga walay hurisdiksyon ang ICC sa mga opisyal ug sundalo sa Amerika tungod kay ang Estados Unidos dili sakop sa Rome Statute nga nagtukod sa maong korte.
Nanawagan usab siya nga bungkagon ang ICC “tisa sa tisa,” ug giakusahan kini nga gigamit alang sa pamulitika imbes nga patas nga pagpatuman sa internasyonal nga hustisya.
Sa laing bahin, nagpadayon ang ICC sa pagpatuman sa iyang mandato sa pag-imbestiga ug paghusay sa mga alegasyon sa genocide, mga krimen batok sa katawhan, mga krimen sa gubat, ug krimen sa agresyon ubos sa Rome Statute.
Nagpabiling nagkalahi ang baruganan sa Estados Unidos ug sa ICC bahin sa hurisdiksyon sa korte ug sa pagpatuman sa internasyonal nga hustisya. (JANE ABULAG)
