Nangatkat nalang sa punuan sa kahoy ang pipila ka residente sa Bangkal, Davao City kagabii. Nunot kini sa epekto sa grabeng pag-ulan dala sa Southwest Monsoon.
Subay sa report sa Coast Guard District Southeastern Mindanao kapin gatus ka mga residente ang ilang narespondehan human sa kalit nga pagsaka sa tubig baha ug kasagaran kanila anaa sa atop sa ilang puy-anan.
Gani, aduna pay mag-igsoon ang mikapyot nalang sa punuan sa kahoy kay milahos na sa atop ang tubig baha human mi-awas ang
Talomo River, kagabie.
Misumada sa 72 ka mga pamilya o kapin gatus ka mga indibidwal ang napabakwit ug gidala sa Lourdes Evacuation Center. Padayon nga gibantayan ang sitwasyon aron masiguro ang kaluwasan sa mga residente.
Hinoon, mihubas na ang baha kaganina sa buntag.
