Gipamugos sa PN Roa Canitoan Transport Cooperative (PONTRANSCO) nga ibalik ang karaang ruta sa ilang mga sakyanan aron malikayan ang doble nga pagsakay ug dugang gasto sa mga pasahero tungod sa mahal nga krudo.
Matod ni Luzminda Escobidal, Presidente sa PONTRANSCO, nga ang pagkabahin sa bag-ong ruta tali sa Distrito 1 ug Distrito 2 naghatag lamang og kabug-at sa bulsa sa mga sumasakay.
Siya miingon nga pinaagi sa single fleet management ug husto nga pagpatuman sa Local Public Transport Route Plan (LPTRP), masiguro ang walong oras nga biyahe sa mga drayber nga sweldado ubos sa modernisasyon.
Ang kooperatiba nagtuo nga ang pagbalik sa karaang ruta makahatag og mas episyente nga serbisyo sa publiko.
Pinaagi niini, makapakunhod kini sa gasto sa mga pasahero ug paghatag sa mas lig-on nga benepisyo sa mga drayber.
