Gi-una pa ang pagpamulitika inay magtrabaho. Kini ang resbak ni Palace Press Officer Atty. Claire Castro batok kang Davao City Mayor Baste Duterte tungod sa pag-unahay sa pamolitika imbes nga hatagan sa pagtagad ang mga biktima sa baha sa iyang dakbayan pagkahuman sa iyang bakasyon sa ubang nasud.
Mi-ingon si Castro nga ang impeachment batok kay Bise Presidente Sara Duterte maoy mandato sa Kongreso ug walay bisan unsang kinalaman ang kasamtangang administrasyon o ang Pangulo niini.
Agig abiso, gi-ingnan ni Castro ang batan-ong mayor nga mas maayong limpyohan sa Bise Presidente ang iyang ngalan batok sa mga akusasyon sa confidential funds ug gitagong kabtangan kon nagplano man kini nga modagan sa labing taas nga posisyon sa nasud.
Gipakawalay-puhunan usab sa abogada ang giingong panghadlok ug pamolitika batok sa mga kaalyado sa pamilyang Duterte pinaagi sa pag-ingon nga ebidensya ra ang gipasukaran sa mga kaso ug bisan gani ang mga kaalyado sa Presidente gakasuhan usab.
Iyang gidugang nga ang kasamtangang gobyerno nagsubay ra sa mga ebidensya ug wala naghimo-himo og intriga o peke nga mga ebidensya sama sa nahitabo sa milabay nga administrasyon.
Gipadayag ni Castro nga walay angay nga ikahadlok ang bisan kinsa kon limpyo ang ilang batasan ug wala sila nakalapas sa balaod sa nasud.
