Gipanawagan ni Pope Leo XIV niadtong adlawng dominggo nga undangon na ang giyera didto sa Ukraine ug irespeto ang international humanitarian law human sa gasaka nga ihap sa mga sibilyang nasamdan ug nawad-an og kinabuhi.
Sa mensahe sa Santo Papa, mipanawagan kini nga undangon na ang mga pagpang-atake batok sa mga inosenteng tawo sama sa mga bata. Base sa datos sa United Nations, kapin 16,000 na ka sibilyan ang nawad-an og kinabuhi sa halos upat ug tunga ka tuig nga giyera tali sa Russia ug Ukraine nga ang kadaghanang patay kay Ukrainian.
Mipadayag pud ang UN human rights office nga nisaka sa hangtud 1/3 ang gidaghanon sa mga nasamdan ug nakalas nga kinabuhi sa sibilyan sa Ukraine sa unang tunga sa tuig. (raniel mahunyag)
