Gikumpirma ni Commission on Audit (COA) auditor Xylene Del Campo nga si Atty. Michael Wesley Poa, kanhi Undersecretary ug Chief of Staff sa Department of Education (DepEd), mao ang mipirma sa mga transmittal letter nga may kalabotan sa audit sa confidential funds sa ahensya niadtong 2023.
Matud ni Del Campo, kabahin sa iyang post-audit work ang pagsusi sa mga tubag sa DepEd sa Audit Observation Memorandum o AOM, lakip ang mga dokumento nga may kalabotan sa una ug ikaduhang quarter sa 2023, diin giila niya ang pirma ni Poa.
Samtang, gipatin-aw usab ni Poa nga ang iyang papel may kalabotan sa pagtubag sa mga obserbasyon sa COA ug dili sa direktang pagdumala o paggasto sa confidential funds.
Gipaabot usab sa depensa ni Vice President Sara Duterte nga tubagon niini sa hustong panahon ang mga isyu sa paggasto sa confidential funds, lakip ang mga transaksyon nga adunay daghang bayad sa nagkadaiyang lugar sulod sa usa ka adlaw. (riza budlao)
