Nanawagan si Pangulong Ferdinand Marcos Jr. sa mas daghang pribadong ospital nga makig-uban sa PhilHealth sa pagpatuman sa no co-payment policy aron maminusan ang gasto sa mga pasyente.
Sa iyang pakigpulong atol sa pagpirma sa Memorandum of Agreement tali sa PhilHealth ug St. Luke’s Medical Center, gibutyag sa Pangulo nga dili dapat mahimong babag ang kakuwang sa kuwarta aron makadawat sa gikinahanglang serbisyong medikal.
Gipasiugda sa Pangulo ang kamahinungdanon sa pagtinabangay sa gobyerno ug pribadong sektor aron mahimong mas barato ug mas dali ma-access ang healthcare.
Lakip sa mga lakang sa gobyerno ang Zero Balance Billing sa mga ospital sa DOH, medical assistance alang sa indigent patients, ug pagpalapad sa mga benepisyo sa PhilHealth.
Tumong niini nga mga lakang nga maminusan ang galastohan sa mga pasyente ug masiguro nga makadawat sila sa gikinahanglang serbisyong panglawas. (jane abulag)
