Gipahinumdoman sa legal expert nga si Atty. Homobono Adaza ang impeachment court nga kinahanglang makakuha gyud og 16 ka boto aron matangtang sa pwesto si Bise Presidente Sara Duterte.
Matud niya, klaro kaayo ang gitudlo sa balaod nga ang 2/3 nga bahin gikan sa tanang 24 ka sakop sa Senado kay 16 ka boto. Tungod niini, dili na kini kinahanglang bag-uhon pa.
Apan kini sukwahi sa gipahayag ni kanhi Chief Justice Hilario Davide Jr. nga nagsugyot nga pwedeng pakubsan ang kinahanglang boto depende sa pilay makatambong nga senador.
Gipadayag ni Adaza nga yano ra kaayo ang numero nga nakasulat sa balaod alang sa hearing ni Bise Presidente Sara, busa dili na kini angay libugon pa sa mga magbabalaod.
