Nagpasidaan ang legal expert nga si Atty. Homobono Adaza nga deretso niyang ipasaka sa Ombudsman ang kasong usurpation of authority ug grave misconduct batok sa bisan kinsang sakop sa Senado nga mangahas sa pag-usab sa 16-vote threshold para sa impeachment trial ni Bise Presidente Sara Duterte.
Sumala sa maong legal expert, nasayop si Presiding Officer Senador Chiz Escudero ug ang ubang sakop sa Senado sa pagduhaduha pa sa balaod.
Matud niya, ang pagpahiwi sa saktong kuwenta nga 2/3 o 16 ka boto gikan sa 24 ka sakop sa Senado kay usa ka klarong pag-abuso sa katungdanan nga supak sa Republic Act 3019 ug Republic Act 6713.
Gisaway usab niya ang mga senador nga nagdala lang og kasamok imbes nga magpakita og maayong gawi ug magbarog para sa hustisya sa nasod.
Tungod niini, giawhag ni Adaza ang mga magbabalaod nga gamiton ang saktong hunahuna ug dili na ilisan ang maong 2/3 nga boto aron dili maguba ang proseso impeachment trial.
