Mibarog ang legal expert nga si Atty. Dale Mordeno batok sa partisan nga politika ug gibug-aton nga gihimo ang 16-vote threshold sa Saligang Balaod aron masiguro nga adunay lig-on ug saktong pag-uyon ang mga senador una makondenar ang usa ka opisyal.
Subay sa iyang gikutlo nga position paper gikan ni kanhi Justice Azcuna, gipasabot niya nga gihimo ang maong lagda aron dili basta-basta nga magamit ang impeachment isip usa ra ka hinagiban sa politika sa mga naggunit sa gahum.
Gipadayag usab sa abogado nga usa ka dako ug bug-at nga kalapasan sa Batakang Balaod kon sulayan man gani sa Senado ang pagpamenos sa maong kinahanglang numero.
Tungod niini, mibarog ang maong legal expert nga gikinahanglan gyud nga makakuha og 2/3 o 16 ka boto gikan sa kinatibuk-ang 24 ka sakop sa Senado aron mapanalipdan ang konstitusyon ug dili maabuso ang pamaagi sa impeachment sa nasod.
