Bakak ug walay kamatuoran ang mga balita sa social media nga adunay nahitabong preshading o pagmarka daan sa mga balota sa nahuman nga BARMM Parliamentary Election.
Mao kini ang gipahayag ni NAMFREL Marawi Representative Mike Palawan, diin gipatin-aw niya nga walay nadawat nga report o ebidensya bahin niini ang ilang mga volunteer nga nagbantay sa matag presinto.
Apan giangkon sa opisyal nga adunay natala nga ginagmay nga kagubot sama sa pagsininggitay ug pagsinumbagay sa pipila ka pamilya sa Butig ug sa Bayabao Central Elementary School.
Dugang pa ni Palawan, daling naresolba ang maong samok tungod sa daling paglihok sa militar ug kapulisan, ug nagpabilin gihapon nga hapsay ug malinawon ang katapusang dagan sa piniliay.
