Binuang ug walay pulos nga tabang sa gobyerno ang plano nga tangtangon ra ang Value Added Tax kun VAT sa system loss charge sa kuryente.
Mao kini ang hait nga pagsaway sa Lay Theologian nga si Wilson C. Amad, diin gitin-aw niya nga dili gyud makatabang sa mga tawo ang maong lakang aron makagawas sa perwisyo sa taas nga bayronon sa kuryente.
Gitandi ni Amad ang maong pamaagi sa usa ka tawo nga nangayo og usa ka tasa nga kan-on apan am-am ra ang gihatag, hinungdan nga pabilin gihapon nga dako ang kita sa mga power company samtang ang publiko maoy nag-antos.
Gidugang sa opisyal nga gilingaw-lingaw ra sa gobyerno ang reklamo sa mga tawo aron lang ingnon nga may gihimo sila taliwala sa sigadad nga pagsaka sa presyo sa kuryente.
Tungod niini, hugot nga gihagit ni Amad ang gobyerno nga tangtangon mismo ang tibuok system loss charge sa resibo ug pabayaron ang mga kompanya sa kuryente sa maong karga.-
