Mosamot ug modako ang hulga sa pait nga kagutom sa mga kabus nga pamilya kon dili gilayon kuhaon sa gobyerno ang buhis nga gipahamtang sa petrolyo.
Nagpahimangno ang ekonomista ug kanhi Misamis Oriental Governor nga si Joey Pelaez nga ang kapaspas sa pagsaka sa presyo sa lana nga moabot sa 9 ka piso sa diesel ug 5 ka piso sa gasolina karong panahona maoy direktang nagpataas sa presyo sa bugas ug mga pagkaon.
Aron mapugngan ang maong peligro, nanawagan si Pelaez nga kuhaon na ang 10 ka piso nga buhis sa gasolina ug 6 ka piso sa diesel nga nagpabug-at sa gastuhan sa mga katawhan.
Tungod niini, giawhag sa kanhi gobernador ang Presidente nga gamiton ang iyang gahum sa labing dali nga panahon aron matangtang ang buhis sa lana ug maluwas sa kawad-on ang pamilyang Pilipino.
