Gipahayag ni Gao Yang, co-founder ug chief scientist sa Chinese robotics startup nga Spirit AI, nga mahimong makab-ot sa humanoid robots ang usa ka dakong breakthrough sa ilang software sa tungatunga sa 2027, nga magtugot kanila sa paghimo og serye sa mga pisikal nga buluhaton base sa natural nga mga instruksyon sa pinulongan.
Matud ni Gao, ang “brain” o software mao gihapon ang labing huyang nga bahin sa robotics, ug gitagna niya nga maabot sa industriya ang GPT-3.0 milestone sa tungatunga sa 2027.
Ang Spirit AI, nga natukod niadtong 2024, nakatigom og kapin $670 milyon ug karon adunay kantidad nga 20 bilyon yuan o mga $2.9 bilyon, samtang naggamit kini og datos gikan sa tinuod nga kalibotan nga gikolekta sa mga 1,000 ka contractor sa tibuok China aron mabansay ang mga robot.
Ang kompanya adunay dose-dosenang Moz1 wheeled humanoid robots nga gibutang sa mga production line sa battery maker nga CATL ug retailer nga JD.com, nga usa usab sa mga investor sa Spirit AI, samtang matud ni Gao nga mas sayon ang paggamit sa mga robot sa industriya ug komersiyal nga serbisyo kaysa sa mga panimalay. (raniel mahunyag)
