Insaktong kordinasyon ang gipanawagan sa lokal nga gobyerno sa LTFRB ug sa mga investor human nahimutangan nga nag-pick-up na og pasahero sa dakbayan ang Green GSM electric taxis nga nakabase sa El Salvador City.
Gipasabot ni Konsehal Roger Abaday nga wala ginasupak ni Mayor Rolando Klarex Uy ug sa konseho ang transportation modernization program, apan kinahanglan gihapon ang hustong pakigsabot ug pagkuha og lokal nga business permit sa dili pa unta magpadagan og hapit 200 ka unit sa bag-ong taxi.
Mao kini ang rason nga nagpahigayon og tigom kagahapon ang lokal nga gobyerno uban ang mga opisyal sa Green GSM ug mga drayber sa dakbayan aron mapanalipdan ang panginabuhi sa mga lokal nga operator.
Gilauman nga pinaagi sa maong panagtagbo, mas mapalambo ang kordinasyon sa tanang bahin ug malikayan ang kasamok sa biyahe
