Gipahimangnoan ni Konsehal Roger Abaday ang mga nagdala sa Green GSM Taxi nga walay gihatag nga espesyal nga pabor kanila ug kinahanglang mosunod gihapon sa tanang patakaran ug ordinansa sa dakbayan.
Gipasabot sa opisyal nga bisan pa man kon adunay temporaryong pagtugot sa pagbiyahe, gidili gihapon sa maong mga electric taxi ang basta-basta nga pag-parking ug pag-agi sa mga dalan nga wala nalakip sa gitugot nga route plan.
Dugang pa sa konsehal, kinahanglan usab silang mokuha og pormal nga business permit sa syudad sa dili pa magbutang ug magpaandar sa ilang mga charging station alang sa maong mga sakyanan.
Tungod niini, gipasabot sa opisyal nga dili garantiya ang permit sa biyahe aron magpatuyang ug maglihok nga exempt sa mga lagda nga gipatuman sa tanan sa Cagayan de Oro.
