Dako nga pondo ang masalbar sa gobyerno ug malikayan ang matag karon ug unya nga gubot sa lungsod kon pormal nga aprobahan nga himoong 5 ka tuig ang termino sa mga opisyal sa barangay ug SK.
Sumala ni Cagayan de Oro ABC President Kapitan Marlo Tabac, imbes 3 ka beses magpahigayon og eleksyon sulod sa 8 ka tuig, 2 ka beses na lang kini buhaton kon mapatuman ang mas taas nga termino.
Gipasabot sa opisyal nga kon magagasto og 20 milyones pesos matag eleksyon, dako kaayo nga 20 milyones pesos ang matipigan ug masalbar sa pondo sa gobyerno.
Gawas sa pondo, gitin-aw usab ni Tabac nga makahatag kini og mas taas nga panahon sa pag-ayo sa relasyon sa mga silingan ug pamilya nga kasagaran mag-away ug maglalis tungod sa init nga politika.
