Gihingusgan ni Defense Lawyer Atty. Mark Vinluan nga walay gitago si Bise Presidente Sara Duterte samtang mitutol sa pagtestigo ni AMLC Executive Director Ronel Buenaventura.
Sa ika-33 nga adlaw sa impeachment hearing ni VP Sara gipahayag ni Vinluan nga ang tanang datos sa bank transaction kinahanglan moagi sa husto nga proseso sa beripikasyon ug pagsunod sa balaod sa wala pa ipublikar, ug dili angay ibalandra sa publiko sa sayop, malisyoso, ug pamulitikang paagi.
Gidugang pa niini nga bisan ang Anti Money laundering Council o AMLC mismo nagpasidaan nga ang ilang mga report sama sa Prosecution Exhibit P-2-7-15-B-AMLC kinahanglan beripikahon, protektahan ang confidentiality, gamiton lamang sa intelligence purposes, dili gamiton isip ebidensya sa pormal nga proseso, ug dili ipanghatag sa ikatulong partido nga walay pagtugot sa AMLC.
Busa, gipasabot sa abogado nga ang paglapas sa mga pamalaod ug proseso makadaot sa katungod sa Bise Presidente ug sa integridad sa hustisya.
