Giklaro sa Korte Suprema nga ang ilang desisyon bahin sa kontrobersiyal nga mga probisyon sa GAA 2024, 2025 ug 2026 nagtutok lamang sa konstitusyonalidad sa mga appropriations ug dili sa personal nga pagpanubag ni President Ferdinand Marcos Jr. o ubang mga opisyal sa gobyerno.
Matod ni Atty. Camille Sue Ting, spokesperson sa Korte Suprema, wala hisgoti sa kaso ang isyu sa accountability busa wala usab maghukum ang korte kon adunay ligal nga responsibilidad ang Presidente o ubang mga opisyal nga nalambigit sa maong mga budget law.
Hinoon, gibutyag sa korte nga ang posibleng civil, criminal, o administrative liability kinahanglan pa nga hisgotan ug hukman base sa mga ebidensyang ipresentar sa husto nga tribunal.
Una nang nag-andam ang Office of the Solicitor General sa pagpasaka sa motion for reconsideration ug pagpangayo sa klaripikasyon sa pipila ka bahin sa desisyon nga nagdeklara nga unconstitutional ang pipila ka probisyon sa nasudnong badyet.
Bisan giila sa Korte Suprema nga unconstitutional ang pipila ka pagdugang sa pondo sa GAA 2024, 2025 ug 2026, nagpabilin nga dili pa final ug executory ang desisyon hangtod mahuman ang proseso sa posibleng paghangyo sa reconsideration.
