Gikumpirma ni Presidential Communications Office Acting Secretary Lino Cayetano nga lakip si Palace Press Undersecretary Claire Castro sa mga nagsumite sa ilang courtesy resignation human sa nahitabong kausaban sa liderato sa Presidential Communications Office. Gipatin-aw usab ni Cayetano nga magpabilin gihapon sa iyang pwesto si Palace Press Officer Undersecretary Claire Castro. Matud ni Cayetano, usa ka bililhong asset sa nasudnong kagamhanan si Castro tungod sa iyang talagsaong katakus sa pagpasabot og maayo sa mga palisiya, programa, ug mga isyu sa kagamhanan ug naghinam-hinam usab siyang makatrabaho kini. Dugtong niini, gibutyag usab ni Cayetano nga mahimong kabahin si Castro sa kabag-ohan nga gusto niyang ipatuman, diin palig-onon niya ang presensya sa PCO ngadto sa mga unibersidad, kabaranggayan, ug local nga komunidad aron masiguro ang pakiglambigit sa mga opisyal ngadto sa mga lungsoranon. (raniel mahunyag)
