Gilugwayan pa og usa ka adlaw sa mga grupo sa magbababoy ang ilang gilusad nga pork holiday nga nagsugod kagahapong adlawa, aron ipamugos ang diha-diha dayong pagpatuman sa temporaryong import ban sa karneng baboy dinhi sa nasud.
Gikumpirma kini ni Agricultural Sector Alliance of the Philippines (AGAP) Party-list Representative Nicanor Briones sunod sa ilang peaceful rally sa atubangan sa buhatan sa Department of Agriculture.
Matud ni Briones, tumong sa ilang panawagan nga mahatagan og higayon nga makabawi ang mga lokal nga magbababoy gikan sa padayong alkansi o pagkalugi tungod sa pagsulod sa imported nga karneng baboy dinhi sa nasud.
Dugtong niini, gipamugos usab sa maong grupo nga patas-an sa upat hangtud lima ka bulan ang import ban ug himoong sakop sa maong ban ang tanang parte sa baboy, lakip niini ang pork meat, liempo ug panit aron malikayan ang technical smuggling nga matud pa nikaylap karong panahona. (raniel mahunyag)
