Doblehon sa kapulisan ang seguridad sa mga terminal, dunggoanan, ug tourist spots sa Northern Mindanao taliwala sa gilaomang dagsa sa mga biyahero sa Kalag-kalag.
Gipasabot ni Police Major Joan Navarro, spokesperson sa PRO-10, nga dili lamang sa mga sementeryo nakapokus ang kapulisan tungod kay magpahigayon usab sila og mobile patrolling ug mag-deploy og tourist police sa mga dapit nga adtoan sa mga tawo.
Gidugang usab sa opisyal nga padayon nilang gipahingusgan ang mga focused law enforcement operations batok sa ilegal nga drugas, dili rehistradong armas, ug uban pang matang sa kriminalidad aron dili makapahimulos ang mga dautang elemento.
Tungod niini, nagpahigayon og inspection ug red teaming ang mga opisyal sa regional headquarters aron masiguro nga tanang sakop sa kapulisan naka-duty ug nakadestino gyud sa ilang mga pwesto.
