Gipasiugda sa Malacañang nga padayon ang paglakag sa mga otoridad kang Senador Ronald ‘Bato’ dela Rosa kung dili kini boluntartyo nga mo-surrender sa gitakdang lugway sa kagamhanan.
Matud ni Palace Press Officer Undersecretary Claire Castro, tumong sa lugway nga mahatagan og higayon ang senador nga mo-surrender nga malinawon ug boluntaryo nga mokooperar ngadto sa mga otoridad.
Gihatagan usab og gibug-aton ni castro na dili moundang ang mga otoridad sa pagpangita kang dela Rosa kon ugaling magmagahi ug magdumili sa pagsunod sa balaod.
Dugang pa ni castro, isip kanhi miyembro sa Philippine National Police (PNP) ug kasamtangang Senador, angay nga si dela rosa ang unang magpakita sa pagtahud ug pagsunod sa balaod.
Mipahayag usab si Castro nga dili angay nga mahimong inspirasyon si dela Rosa sa ubang mga indibidwal nga gaatubang og warrant of arrest aron magtago inay nga atubangon ang proseso sa balaod.
Dugtong niini, nagpabiling panawagan sa Malacañang sa kasamtangan ang boluntaryong pagsurrender sa Senador aron malikayan ang mas hugot nga lakang sa mga otoridad. (raniel mahunyag)
