Gikumpirma sa Department of Justice (DOJ) ang pagsumiter ni kanhi Senate Sergeant-at-Arms Mao Aplasca og ‘counter-affidavit’ bahin sa reklamong giatubang niini.
Personal nga midangop si Aplasca sa buhatan sa DOJ ug mitambong sa ikatulong pagdungog sa preliminary investigation sa ‘direct assault complaint’ nga gipasaka Philippine National Police-Criminal Investigation and Detection Group (PNP-CIDG) mahitungod sa nahitabong pagpamusil o ‘shooting incident’ niadtong bulan sa Mayo sulod mismo sa Senado.
Matud ni Justice Spokesperson Atty. Polo Martinez, human sa pagsumite og counter-affidavit kay hulaton kung magpasaka pa ba og ‘reply-affidavit’ ang ‘complainants.’
Gitakda ang pagsumiter og tubag sa petsa 6 sa bulan sa Nobyembre, samtang ang ‘rejoinder-affidavit’ usab sa panig sa respondents kay mahimong isumiter sa petsa 13 sa susamang bulan.
Kon ugaling dili na magsumiter og ‘reply-affidavit’ ang PNP sa ‘counter-affidavit’ ni Mao Aplasca kay mahimong ‘submitted for resolution’ na ang reklamo sa mga musunod nga bulan, diin musunod niini ang pagdetermina sa prosekusyon sa maong reklamo kung mahimo ba kining kaso ug hingpit nang ipasaka sa tukmang korte.
Bisan pa nga personal nga miatubang si Aplasca sa buhatan sa DOJ, apan nagdumili na kini sa pagkomento ug paghatag og pahayag. (raniel mahunyag)
