Gipasirado na ang animal crematorium nga nalambigit sa mga nakit-ang patayng lawas sa mga iro ug iring nga gilabay lamang sa usa ka bakante nga lote sa San Jose Del Monte, Bulacan.
Sumala sa animal rescue group nga Luna and Furry Siblings ug sa kumpirmasyon sa Philippine National Police, 25 ang kinatibuk-ang ihap sa mga patayng hayop nga gilabay sa maong dapit.
Dugang pa sa kapulisan sa San Jose Del Monte Bulacan, 16 niini ang gidala sa Bacoor City, samtang siyam ang gilayong gipa-cremate sa Quezon City.
Natino na usab sa lokal nga kagamhanan sa Bacoor ang nalambigit matud pa nga crematorium nga giilang Ahjay Paws Aftercare nga diha-diha dayon nilang gipasirado.
Matud ni Bacoor City Mayor Strike Revilla, ila nang gitahasan ang kapulisan ang mag-imbestigar sa maong panghitabo ug magpasaka og kaso sa nanag-iya niini.
Dugang pa sa alkalde, gikinahanglan nila ang tabang sa mga complainant sa pagtino sa mga patayng hayop alang sa imbestigasyon aron mapalig-on pa ang ilang ipasakang kaso.
Gipatawag na usab sa LGU ang nanag-iya sa gidudahang crematorium, apan gipanghimakak niini ang pagkalambigit sa maong insidente.
Sa kasamtangan, nagpadayon pa gihapon ang back tracking sa mga CCTV alang sa giingong puti nga sakyanan nga naglabay sa maong mga patay nga hayop. (raniel mahunyag)
