Gidepensahan ni DA Secretary Arnel de Mesa ang sayo nga pag-import sa bugas aron masiguro nga adunay igo nga suplay sa nasud batok sa posibleng epekto sa El Niño sa Pilipinas.
Miingon si De Mesa nga dili lamang ang Pilipinas ang mahimong maapektuhan sa lapad nga kalamidad sa klima, apan lakip usab ang ubang mga nasud nga nag-prodyus ug bugas.
Gipasabot sa opisyal nga kon madaot ang suplay sa ubang mga nasud, posibleng mosaka ang presyo sa bugas sa internasyonal nga merkado ug unahon sa mga exporting countries ang ilang kaugalingong panginahanglan inay magpadayon sa pagbaligya ngadto sa gawas.
Gidugang pa sa opisyal nga kaniadto nakasinati usab ang nasud og mas dako nga importasyon sa bugas tungod sa El Niño, ug kini kabahin sa mga lakang nga gigamit sa nangaging administrasyon.
Busa, giingon ni de Mesa nga importante nga adunay igo nga reserve supply karon pa lamang aron matabangan ang nasud nga makaagi sa gilaumang mas grabe nga epekto sa El Niño sa unang semestre sa sunod tuig.
