Subling gidepensahan ni PCol. Allen Rae Co, hepe sa Public Information Office sa Philippine National Police (PNP), ang pahayag ni Interior Secretary Jonvic Remulla nga mahimong moabot sa kapin 10,000 ka mga operatiba ang ikatugyan sa usa ka operasyon kon adunay posibleng komprontasyon sa pag-aresto kang Senator Ronald “Bato” Dela Rosa.
Matud ni Co, kabahin sa standard operational planning sa kapulisan ang pagtan-aw sa tanang posibleng sitwasyon nga mahimong mahitabo sa usa ka operasyon.
Gipasabot niya nga kinahanglan nga andam ang mga operatiba dili lamang sa normal nga kahimtang kondili usab sa pinakagrabe nga posibleng senaryo o worst-case scenario.
Namugos ang opisyal nga ang pagplano alang sa nagkalain-laing contingencies maoy pamaagi sa PNP aron masiguro ang kaluwasan sa publiko ug sa mga operatiba panahon sa pagpatuman sa balaod.
Busa, ang gihisgutan nga gidaghanon sa mga operatiba dili pasabot nga mahitabo gyud ang kagubot, kundili kabahin lamang sa preparasyon alang sa tanang posibilidad.
Giingon ni Co nga importante nga hingpit ang kahandam sa kapulisan sa matag operasyon aron matubag dayon ang bisan unsang kahimtang nga mahimong motungha.
