Gikumpirma sa National Privacy Commission (NPC) karong Martes, Nobyembre 10, nga nakadawat kini og personal data breach notifications gikan sa napulo ka ahensya sa kagamhanan.
Lakip sa mga ahensyang nakasinati og data breach kay ang Department of Information and Communications Technology (DICT), Department of Labor and Employment (DOLE) pinaagi sa Bureau of Local Employment niini, Bureau of Internal Revenue (BIR), Philippine Amusement and Gaming Corporation (PAGCOR).
Nakasinati usab og data breach ang Department of Justice (DOJ) pinaagi sa Office for Alternative Dispute Resolution niini, Securities and Exchange Commission (SEC), Department of Trade and Industry (DTI), Department of Science and Technology – Philippine Institute of Volcanology and Seismology (DOST-PHIVOLCS), Presidential Commission on Good Government (PCGG), ug bisan ang Philippine Coast Guard (PCG).
Sumala sa NPC, gisugdan na nila ang imbestigasyon sa maong pag-agas sa mga personal nga datos gikan sa nalambigit nga mga ahensya.
Matud ni NPC Deputy Privacy Commissioner ug Spokesperson Atty. Jose S. Belarmino II, ang matag pahibalo nga nadawat sa NPC kay susihon ug timbang-timbangon sa ilang Compliance and Monitoring Division, nga maoy magsusi sa matang ug sirkumstansya sa gitaho nga insidente, ang posibleng epekto niini sa mga apektadong indibidwal, ug ang mga lakang nga gihimo sa hingtungdang ahensya.
Dugang pa sa tigpamaba, bisan pa nga responsibilidad usab sa komisyon ang pagpanguna sa pagpanalipod sa mga sensitibong datos, responsibilidad gihapon sa mga ahensya sa kagamhanan nga sigurohon ang proteksyon sa mga datos aron masiguro ang kaluwasan ug malikayan ang bisan unsang matang sa pagpahimulos sa mga apektadong indibidwal.
Gipamugos usab sa NPC nga tulubagon sa mga ahensya isip personal information controllers ang kaluwasan sa mga personal nga datos nga anaa sa ubos niini, outsourced man kini o subcontracted gikan sa third-party service providers.
Samtang, gipahinumdoman usab sa NPC ang publiko nga magpabiling magbinantayon batok sa mga phising attempt, scam, identity theft, ug uban pang matang sa social engineering nga mahimong magresulta sa pagpahimulos gikan sa gitahong data breaches.
Gipahimangnoan usab nila ang publiko nga magbantay batok sa pagtubag sa mga kadudahang mensahe, pag-click sa mga dili pamilyar nga website link, pag-download og mga attachment, ug pagpaambit sa mga personal ug sensitibong impormasyon.
Nipasalig usab ang NPC nga padayon nilang gibantayan ang mga taho sa data breach ug ang pagtuman niini sa katungdanan subay sa Republic Act No. 10173 o ang Data Privacy Act of 2012. (raniel mahunyag)
