Siyam ka tawo ang nakasinati og grabeng pagkaangol samtang 48 pa ang nakaangkon og gagmayng kadaot human mabangga sa usa ka pampublikong bus ang 31 ka laing pang mga sakyanan sa Bundang District, Seongnam City, South Korea.
Nahitabo ang sunod-sunod nga pagkabangga pasado alas 7:34 sa buntag sa dihang nabanggaan sa bus ang mga sakyanang naghulat sa traffic light sa wala pa kini mihunong human mabanggaan ang median barrier.
Sumala sa National Fire Agency, 32 ka sakyanan ang nalambigit sa maong aksidente, lakip ang upat ka bus, usa ka trak ug 27 ka mga pampasaherong awto, diin nagpadala ang mga awtoridad og 88 ka personahe ug 33 ka sakyanan pangresponde ug nagtukod og estasyon alang sa medikal nga emerhensiya sa dapit nga nahitaboan.
Giplano sa kapulisan nga susihon ang mga rekording sa CCTV ug datos gikan sa black box sa bus aron matino ang hinungdan sa maong aksidente. (raniel mahunyag)
