Manubag ug mag atubang og silot ang mga field commanders sa kapulisan kon magpabaya ug walay himuong aksyon batok sa illegal mining sa ilang tagsa tagsa ka hurisdiksyon.

Gibutyag ni Police Regional Office 10 Spokesperson Police Major Joann Navarro nga gimanduan ni Regional Director Police Brigadier General Nestor Babagay Junior ang tanang hepe sa kapulisan nga sumpoon dayon ang maong ilegal nga kalihukan sa lokal nga lebel pa lang ug dili na paaboton nga moabot pa ang report sa buhatan sa rehiyon.

Gipasabot ni Navarro nga walay kamatuoran ang bisan unsang pagpanggamit sa pangalan sa ilang labaw tungod kay hugot nga gidili sa liderato ang pagprotehir sa mga nagpaluyo sa ilegal nga kalihukan.

Gipasalig sa tigpamaba nga padayon ang hugot nga koordinasyon sa kapulisan uban sa Department of Environment and Natural Resources ug Mines and Geosciences Bureau aron hingpit nga mapapas ang ilegal nga pagmina sa tibuok Amihanang Mindanao.