Giangkon sa lokal nga kagamhanan sa Cagayan de Oro nga dili tanang barangay ang makaako sa pagpalit og water tanker alang sa water rationing gamit ang ilang 5 porsyento nga disaster fund tungod sa kagamay sa pundo sa uban.

Giklaro ni Acting City Information Officer Jade Adeser nga walay eksaktong presyo nga gitakda ang syudad sanglit ang matag barangay ang mopili sa klase sa tanker nga ilang paliton base sa ilang kapasidad.

Gipasabot ni Adeser nga ang mga barangay nga maglisod sa gasto mahimong modangop sa Local Finance Committee nga gipangulohan ni Mayor Rolando Klarex Uy aron matabangan sa ilang suliran sa pundo.

Gipasalig sa opisyal nga makigtagbo pag usab ang mayor sa mga kapitan sa dili pa mosaka ang kainit sa Super El Niño aron maseguro nga makahakot og tubig ang tanang barangay gikan sa centralized source sa City Hall.-