
Gipadayag sa Filipino-American nga mang-aawit ug miyembro sa Black Eyed Peas nga si Apl.de.Ap ang iyang lig-on nga koneksyon sa Pilipinas, ilabi na sa iyang yutang natawhan nga Sapang Bato, Pampanga, nga giisip gihapon niyang tinuod nga panimalay bisan dugay na siyang nagpuyo sa Estados Unidos.
Atol sa usa ka pakighinabi, gipasabot niya nga ang pagbalik sa iyang gigikanan kay nagpahinumdom kaniya kung asa siya nagsugod ug sa mga leksiyon bahin sa kakugi nga iyang nakat-onan sa iyang pagkabata.
Isip bahin sa iyang suporta sa komunidad, gipakita niya ang mga classroom nga natukod pinaagi sa iyang tabang ug gihisgutan usab ang pagpabalik-tukod sa karaang balay sa iyang lola sa Sapang Bato, diin nagpuyo karon ang iyang inahan.
Matud pa niya, ang iyang pagpadako maoy nagdasig kaniya sa pagpaambit sa tabang nga iyang nadawat kaniadto pinaagi sa pagsuporta sa iyang komunidad sa Pampanga ug sa tibuok Pilipinas. (raniel mahunyag)










