CAGAYAN DE ORO CITY-Gialerto sa militar ang local govt units ingon man ang kapolisan sa nagkadaiyang syudad sa rehiyon batok naglapad nga recruitment sa grupong Maute-ISIS.
Gikompirmar ni Joint Task Force Ranao deputy commander Col Romeo Brawner nga nakasulod na ang pipila sa galamay sa Maute-ISIS mismo dinhi sa syudad aron mohimo’g recruitment alang sa ilang dugang miembro.
Gani,target sa maong grupo ang mga dagkong tunghaan sa kolehiyo ug unibersidad diin tanyagan nila sa balor 20-mil pesos ang mga tinun-an nga ilang makumbinser nga mokuyog sa pakigbisog nila batok sa gobierno.
Samtang gikompirmar ni Iligan City Police Office Director Sr/Supt Leony Roy Ga ang massive recruitment sa grupong Maute- ISIS sa pipila ka nag-unang syudad sa rehiyon.
Kini human giagi usab sa mga terorista sa social media ang ilang pagpahaylo sa mga tinun-an ug ilabina sa mga balik-Islam nga mo-uban sa pakigbatok sa gobierno.
Gibutyag ni Ga nga may mga website usab sila nga gisubay aron mapugngan ang pagpang-recruit sa salin-salin sa mga terorista nga unang gipulbos sa militar sulod sa Marawi City sa miaging lima ka bulan.
