CAGAYAN DE ORO CITY – Gibulgar na ni Police Regional Office Bangsamoro Autonomous Region regional director Brig Gen Allan Nobleza nga dugay nang gusto sa Dawlah Islamiyah Maute terror group nga pabutha’g bomba ang Mindanao State University main campus sa Marawi City,Lanao del Sur.
Namahayag ang heneral nga mismo pa sa panahon ni South East Asia ISIS emir Abu Zacaria alyas Abu Dar nagsugod ang maong plano sa bombahan ang maong unibersidad.
Apan wala na kini natuman sa maong terorista kay giunhan siya’g lusob sa kapolisan ug militar sa iyang safehouse sa Marawi City diin siya misukol-patay samtang gisilbi ang warrant of arrest niadtong Hulyo ning tuiga.
Apan gibutyag ni Nobleza nga pabiling panimalos batok sa gobierno ang MSU gym bombing kay daghan sa tag-as nga lideres sa mga terorista ang napatay sa mga operasyon sa Mindanao.
Samtang gikasuhan na sa SITG Dimaporo Gymnasium Explosion ang unang nadakpan nga giingong dunay posibleng kalambigitan pagbusikad sa bomba nga gikamatay sa upat ka tawo ug miangol sa laing 72 ka manimbahay sa main campus.
Miingon si Nobleza nga maoy gikasuhan sa kasong obstruction of justice ug illegal possession of explosives ang sinumbong nga si Jaffar Gamo Sultan alyas Kurot.
Siya miingon nga nadakpan usab sa SITG ang duha personalidad nga dunay kasong murder nga giingong maoy nag-atiman sa persons of interest nga sila Cadapi Mimbesa alyas Engr ug Arsani Mimbesa alyas Lapitos.
Hisayrang sila alyas Lapitos ug alyas Engr ang nakuhaan sa CCTV footages nga misulod sa gym ayha paspas mipasirit sa ilang motorsiklo ug gilayong misunod na ang pagbuto sa bomba sulod sa gym sa miaging Disyembre 3 sa buntag.
