CAGAYAN DE ORO CITY – Giaghat ni Cagayan de Oro Archdiocese Most Reverend Archbishop Jose Cabantan,DD ang katawhan nga tinud-anay puy-an ang pagmalandong samtang gi-obserbar ang semana santa.
Kini sa tuyo nga masabtan sa publiko kon nganong gitudlo sa simbahan ang pasyon,pagpasakit,pagkamatay ug pagkabanhaw ni Kristo-Hesus nga nakig-uban sa mga tawo sa miaging kapanahonan.
Siya miingon nga pinaagi sa pagpalawom sa pagpamalandong,mas matuhog sa katawhan ang katuyuan kon nganong tinuig nga himoon sa simbahan ang semana santa.
Samtang didiskorahe sa simbahan ang mga mismong deboto niini nga putlon na ang pipila ka buluhaton sa karaang panahon pinaagi sa pagdagmal sa kaugalingon sa matag-obserbar sa semana santa.
Namahayag si Reverend Father Alan Pulgo,rector sa San Agustin Cathedral nga maoy angay masabtan sa katawhan ang tinud-anay nga kahulugan sa gihimo ni Kristo ug dili ang mugna lang sa pipila ka pagtoo-too.
Siya miingon nga imbis nga maglulinghayaw panahon angay magpuasa ug mag-ampo kay kini ang katuyuan sa semana santa.
