CAGAYAN DE ORO CITY – Pangkasuhan sa pagsupak sa Republic Act 9165 o Comprehensive Dangerous Drugs Act of 2002 ang magka-pamilya nga nalambigit sa illegal nga droga sa lungsod sa Tagoloan,Misamis Oriental.
Matud ni Police Regional Office 10 spokesperson Major Joann Navarro nga maoy nasignit sa mga operatiba sa Tagoloan Police Station ang usa ka alyas Aiza ug alyas JJ nga pulos hingkod ang edad kay nasulod sa la-ang pinaagi sa buy-bust operation.
Gibutyag sa taho nga pinaka-target sa operasyon ang bana ni Aiza nga si Jose apan paspas nakasibat hinungdan nga duha lang ang nadakpan.
Nabawian sa 14 ka sachets sa gitoohang shabu balor 884-mil pesos ang mga dinakpan rason nga sila pangkasuhan sa RA 9165 sa piskalya sa probinsya ugmang adlawa.
Una niini,gidayeg ni PRO 10 Director Brig Gen Rolindo Suguilon ang paningkamot sa ilang lower units aron bungkagon ang pagkaylap sa gidiling droga sa rehiyon 10.
