Gikumpirma sa Police Regional Office 10 nga usa ka pasahero ang namatay samtang 23 pa ang padayon nga giatiman sa ospital human matumba ang usa ka bus sa Rural Transit Mindanao Incorporated nga gikan sa Dipolog City padulong sa Cagayan de Oro didto sa Barangay Mobod kagahapong adlawa.
Sumala ni PRO-10 Spokesperson PMaj Joan Navarro sa Bombo Radyo, sa kinatibuk-an 51 ka pasahero apil ang driver ug konduktor ang sakay sa maong bus.
Base sa inisyal nga imbestigasyon, napukan ang bus human mosulod sa kurbada ug sa dihang misulay og maniobra ang driver, nahulog kini sa kanal ug natumba.
Dugang pa ni Navarro, ang namatay usa ka senior citizen nga babaye gikan sa Calamba, Misamis Occidental.
Ang ubang pasahero nakaangkon og minor injuries ug naka‑outpatient na, apan 23 gihapon ang nagpabilin sa ospital bisan og stable na ang ilang kahimtang.
Gipasabot usab sa kapulisan nga padayon ang imbestigasyon aron matino ang eksaktong hinungdan sa aksidente samtang gisusi ang kondisyon sa dalan ug ang pagmaniobra sa driver.
Sa karon, naghatag na og pinansyal nga tabang ang operator sa bus sa mga biktima samtang nagpadayon ang pagmonitor sa kahimtang sa mga na-angol.
