Gisuportahan sa mga negosyante ubos sa Philippine Chamber of Commerce and Industry ang proyektong Pax Silica tungod sa gibana bana nga 40 ngadto sa 70 bilyones dolyares nga puhunan nga mahimo niining madala sa nasud.

Gipadayag ni Oro Chamber of Commerce President Engr. Almarico Brito nga bisan sa dakong tabang niini sa ekonomiya, nasabtan sa ilang sektor ang kabalaka sa mga nagprotesta bahin sa epekto sa maong industriya sa suplay sa tubig ug kuryente.

Giduso ni Brito nga kinahanglan ang sayo nga technical feasibility study aron mapangitaan og solusyon ang panginahanglan sa utilities sa dili pa hingpit nga sugdan ang proyekto.

Gitataw sa lider sa mga negosyante nga naglisod karon ang nasud sa pagdani og langyawng puhunan hinungdan nga dili angay palabyon ang maong oportunidad samtang giatiman ang mga posibleng hagit niini.