Gihagit sa ekonomista nga si kanhi Misamis Oriental Vice Governor Joey Pelaez ang mga grupo ug kabatan onan nga nagprotesta batok sa Pax Silica nga magbasa pag ayo ug mopresentar og alternatibong solusyon kon unsaon pagpalambo sa ekonomiya sa Pilipinas.
Gikuwestiyon ni Pelaez kon aduna bay ikatanyag nga laing industriya ang mga kritiko nga makahatag og trabaho dinhi sa nasud aron dili na mapugos ang mga Pilipino nga manarbaho sa gawas ug mahunong na ang sobrang pagsalig sa mga imported nga produkto.
Gipadayag sa kanhi bise gobernador nga kinahanglan sa Pilipinas ang industriyalisasyon ug pagpabarato sa kuryente aron mosaka ang produksyon sa nasud imbes nga magsige na lang og palit gikan sa abroad nga makapasamot sa kamahal sa palaliton.
Giawhag sa kanhi opisyal ang mga nagprotesta nga makigtambayayong sa pagpangita og pamaagi alang sa modernisasyon ug kalamboan imbes nga magpunay lang og babag sa mga oportunidad.











