Nanawagan ang grupong August Twenty-One Movement (ATOM) sa mga magbabalaod nga iprayoridad una ang interes sa nasud kaysa ang pagpamulitika, human sa desisyon sa Korte Suprema nga ibasura ang Articles of Impeachment batok kang Bise Presidente Sara Duterte.
Sumala ni ATOM President Volt Bohol, bisan pa nga politikanhong lihok ug katungod ang pagpasaka sa mga reklamo batok sa usa ka opisyal nga gituohang adunay anomalya, ang impeachment usa ka probisyon ug safety measure sa Konstitusyon aron malikayan ang pag-abusar sa gahum sa mga tiwaling opisyal ug mapanalipdan ang katawhang Pilipino.
Gipahinumduman usab sa ATOM ang mga magbabalaod nga angay respetohon ang maong proseso, ug ipairal ang patas nga pagpatuman sa balaod, kay sumala pa nila, walay aso nga makumkom, ug sa husto nga proseso mailhan ra gihapon kung kinsa ang tinuod nga guilty.
Gihangyo sa grupo ang mga magbabalaod nga dili harangan ang mga reklamo sa katawhan ug dili lang magpabilin sa teknikalidad nga mahimong makababag sa paglusot sa hustisya ug sa tinuod nga pagpanubag sa mga opisyal sa gobyerno.
