CAGAYAN DE ORO CITY – Wala makakahatag sa disgrasya sa kapolisan ug militar ang improvised explosive device o IED nga iya sa mga sakop sa Dawlah Islamiya nga unang napatay sa operasyon sa Barangay Bangco,Sultan Naga Dimaporo,Lanao del Norte.
Kini human wala kabuto ug nakit-an sa opisyal sa barangay ang bomba rason nga paspas gitaho sa kapolisan ug gilayong gi-respondehan sa PNP-Provincial Explosive and Canine Unit ang lugar.
Gigamitan sa PECU sa water cannon disruptor ang IED aron dili makahatag sa kadaot sa mga tawo nga nanimuyo sa maong lugar.
Unang gitoohan nga posibleng gamiton ang maong bomba batok sa mga otoridad nga tuyo modakop sa lima ka sakop DI nga nag-atubang sa dagkong mga kasong kriminal sa Zamboanga Sibugay.
Dumduman nga napatay sa operasyong pulis ug militar ang lima ka DI members kay misukol sa pagsilbi sa warrant of arrest sa miaging Oktobre 23.
