CAGAYAN DE ORO CITY – Gitawag ni City Mayor Rolando ‘Klarex’ Uy ang mga kapitanes sa 80 ka barangay alang sa dinaliang tigom kabahin sa isyu sa naghitak nga gangs sa kabatan-unan sa dakbayan.
Gihimo ni Uy ang tigom sa iyang opisina resulta sa makalolooy nga gidangatan sa 14 anyos nga si Nathaniel Ebalang nga taga-Ramonal Village,Barangay Camaman-an ning syudad diin gitabanga’g kulata hangtod gidunggab sa laing grupo sa gang sa Corrales Avenue ning syudad sa miaging Domingo sa hapon.
Miingon ang mayor nga mismo ang mga punong barangay ang dunay direktang kasayuran sa mga kalihukan sa ilang kabataan aron gilayong mapangitaa’g paagi kon may mga dili maayo nga tilimad-on nga mabantayan niini.
Siya miingon nga dili na kini makatugot nga masubli ang karambola tali sa Kaibigan Lang Po ug Soy Shit Dem nga gangs kay makahatag kini sa dili maayo nga impluwensiya sa kabataan sa dakbayan.
Una nang gimando ni Uy kang Police Col. Aaron Mandia sa Cagayan de Oro City Police Office nga hinagbuon ang tanang gangs nga nakabase sa dakbayan aron makuhaa’g profile ug mapahinumduman sa unsay angayang buhaton nga kalikayan ang panagbikil.
Dumduman usab nga gilayong gipada-ag tabang sa mayor ang kabus kaayo nga pamilya sa biktima samtang nakahaya kini sa ilang pinuy-anan sa maong brgy.
Hinoon,nakasuhan na’g murder ang nakadunggab-patay nga suspek nga si Raul Lumamba,18 anyos nga taga-Brgy Gusa ug laing lima nga gilangkuban sa mga menor de edad nga pulos nanimuyo sa dakbayan.
Dako pa unta’g tsansa nga maluwas ang kinabuhi ni Ebalang kon may midali’g dala niini sulod sa Northern Mindanao Medical Center apan nakasubo kay ang mga tawo sa palibot samtang natigayon ang kremin ang igo ra nagtan-aw ug wala makabadlong sa pagrayot sa mga batan-on.
Hisayrang naggukod ang duha ka grupo gawas sa city ug mall sa Gaisano hangtod nga nasapon ang biktima pag-abot tungod sa Centrio Ayala Mall ug NMMC ayha nahiagom sa grabeng kulata,pagbunal sa tubo ingon man pala hangtod nadunggaban-patay ni Lumamba.
