Gikompirmar ni Prosecutor Rep. Terry Ridon nga ipresentar karong adlaw sa Senate Impeachment Court ang pormal nga manifestation sa Prosecution Panel nga ila nang ibasura ang bribery case batok kang Bise Presidente Sara Duterte aron mapaspasan ang proseso sa impeachment hearing.
Sa pakighinabi sa prensa, namahayag si Ridon nga igo na ang ebidensya sa tulo ka artikulo sa impeachment aron mapamatud-an ang culpable violation of the Constitution ug betrayal of public trust.
Gilauman nila nga maatapos ang presentasyon sa kaso sulod sa duha ka semana samtang gi-subpoena na ang walo ka bangko, pito ka insurance companies, ug ang BIR aron ipresentar ang dugang ebidensya.
Hisayran nga pinaagi sa pagtangtang sa bribery case makapamubo kini sa trial ug malikayan nga molungtad hangtod sa 2027.
Ang prosecution magpokus lamang sa artikulo sa confidential funds, unexplained wealth, ug grave threats nga giakusar batok sa Bise Presidente.
