CAGAYAN DE ORO CITY – Gibarugan ni City Mayor Oscar Moreno nga dili pagpatoo apan tinguha nga pagtabang lamang batok COVID 19 ang iyang pagpakabana sa kahimtang sa mga kalungsuran sa Misamis Oriental.
Kini ang pagpasabot sa mayor nunot sa daghang imbitasyon kaniya aron mohatag sa best practices kon giunsa pagdala ang syudad batok sa bayrus.
Apan giangkon ni Moreno nga gikasakit niya pag-ayo ang hukom sa probinsya nga gipatak-upan ang provincial hospital sa Balingsag tungod lamang sa upat ka administrative staff nga positibo sa bayrus sa miaging semana.
Gihagit ni Moreno ang mga opisyal sa probinsya nga ihikling ang naghinobrang politika ug magtinabangay nga proteksyonan ang katawhan sa bayrus.
Samtang dili kumbinsido si Misamis Oriental Gov Bambi Emano sa gipatoo nga wala namolitika si City Mayor Oscar Moreno sa pagpanghilabot kon unsa man ang kalihukan sa kalungsuran pagsanta sa coronavirus disease.
Kini human unang nagtanyag si Moreno nga mahimong dad-on ang positibong mga kaso sa probinsya ning syudad tungod sa kakulang sa pasilidad batok bayrus.
Namahayag si Emano nga gusto lamang sa mayor nga kanunay anaa sa kondisyon nga kalisod ang katawhan aron pag-abot sa bakuna,sayon ipatoo nga kini may epektibong gihimo kontra COVID-19.
Dugtong gitin-aw ni DoH-10 infectious disease cluster head Dr Ian Gonzales nga hugot nga koordinasyon ug partisipasyon sa lokal nga kagamhanan sa national govt ug private sector ang epektibong solusyon aron mabatukan ang Covid-19 pandemic.
Si Gonzales miingon nga dako ang ilang pagpasalamat syudad gumikan sa inisyatiba niini nga magbaton sa kaugalingong testing facility.
Siya miingon nga dako kini’g natabang hinungdan nga napugngan ang paspas nga takod sa bayrus sa syudad.
Hisayran nga nakadawat na usab sa dugang kahimanan gikan sa city govt sa dakbayan ang Department of Health aron magamit sa paspas nga pagtumbok sa mga tawo nga natakdan sa maong sakit.
