CAGAYAN DE ORO CITY – Gitratar ni Cagayan de Oro 2nd District Rep Rufus Rodriguez nga anaa sa peligro nga kahimtang ang gawasnong pagpadayag sa matag-tawo dinhi sa nasud.
Kini ang reaksyon ni Rodriguez tungod sa pagdumili sa 70 ka kongresista ubos sa komitiba sa Legislative Franchises nga hingpit dili e-renew ang gipangayo sa ABS-CBN Corporation nga 25 ka tuig nga operasyon.
Miingon si Rodriguez nga wala sunda sa naglangkob sa technical working group ang resulta sa imbestigasyon ug nagpagawas sa ilang kaugalingon nga desisyon.
Si Rodriguez ang usa sa mga kongresista nga miduso’g resolusyon kaniadto aron dunggon ang franchise renewal sa kompanya.
Samtang katungod sa House Committee on Legislative Franchises nga mo-isyu o dili sa prangkisa ngadto sa kompanya sa telebisyon ug ubang media entities.
Kini usab ang gipabati ni Bukidnon 4th District Rep Rogelio Roque kabahin sa pagdumili sa 70 ka kongresista nga makabalik sa pag-ere ang ABS-CBN Corporation sa nasud.
Miingon si Roque nga kon makahukom ang pamilyang Lopez pagbaligya sa ilang network,hayan makabalik sa trabaho ang libuang mga empleyado nga apektado sa pagsira niini.
