CAGAYAN DE ORO CITY – Dismayado ang City Local Environment and Natural Resources Office o CLENRO sa market vendors nga gitugtan makabaligya sa mga produkto alayon sa kapaskuhan ug pagsugat sa bag-ong tuig sa merkado Cogon ning syudad.
Kini human wala sunda sa maong market vendors ang usa sa mga kondisyon nga hipuson ang ilang mga basura ayha manguli kay kabahin sa mosugat sa bag-ong tuig.
Miingon si CLENRO manager Engr Armen Cuenca nga ipatawag niya ang mga opisyal sa market vendors aron hisgutan ang sunod nga lakang sa pagtugot pagpabaligya palibot sa Cogon market.
Siya miingon nga nagkinahanglan sa tukmang disiplina ang maong mga wala mosunod sa kalagdaan ug dili na tugtan makausab sa taliabot pagsaulog sa pasko ug pagsugat sa bag-ong tuig.
Una nang nagkatag sa social media ang mga kuhang hulagway ug videos sa nagpasak nga mga basura kay gipang-biyaan sa iresponsable nga market vendors sa miaging gabii.
